Glllllaaaaaataðððð

Mikið djöfulli lenti ég í leiðinlegri lífsreynslu í gær.

Fór í skólan til þess að vinna í lokaverkefninu eins og ég hef gert síðustu vikur nema hvað að harði diskurinn sem ég geymi ALLT sem ég hef gert fór ekki í gang og er tvísýnt um framtíð hans.

Ef svo fer þá er öll vinna sem ég hef gert síðustu þrjú árin horfin, þar á meðal lokaverkefnið og plakat sem ég var að vinna í og átti eftir að skila.

Ömurlegt helvíti.  Ég vona samt að það sé hægt að bjarga þessu en ég er samt byrjaður upp á nýtt á lokaverkefninu. Helvíti gott það.

Never mind the Buzzcocks. Besti tónlistar spurningaþáttur EVER!

Mig langar að benda á frábæran sjónvarpsþátt á BBC 2 sem heitir “Never Mind the Buzzcocks” og er með fyndnustu og skemmtilegustu spurningaþáttum sem ég hef séð. Mig grunar að Dr. Gunni og Felix hafi vitað um þennan þátt þegar þeir gerðu Popp punkt hér um árið því að þessum tveimur þáttum svipar eilítið til hvors annars. Never Mind the Buzzcocks er þannig byggður upp að tvö lið keppast um stig. Bæði liðin hafa liðsstjóra sem eru fastráðnir í þættinum en utanað komandi keppendur eru mis frægir tónlistarmenn, fjölmiðlafólk eða grínistar. Stjórnandinn, Simon Amstell gerir miskunnarlaust grín að keppendum og þeim sem eru teknir fyrir í spurningum en á móti kemur að keppendur geta gert eins mikið grín af öllum hinum og þeir vilja. Þannig að maður liggur í kasti yfir þessum þætti og tekur síðan eftir að það er rauninni enginn að keppa um neitt, bara hafa gaman af þessu.

Youtube.com er með slatta af þáttum í heilu lagi á sinni síðu og mæli ég eindregið með því að menn skoði þessa djöfla snilld. Ég get bara ekki lýst þessu nógu vel.

Hérna er smá forsmekkur. Heill þáttur í þremur hlutum á youtube.

1. Hluti.

2. Hluti

3. Hluti

Nevermind the Buzzcocks á youtube.com 

Svar mitt sem Jón Valur eyddi út af síðunni sinni.

Mér finnst alveg sérstakleg breiður hópur fólks sem skrifar hérna á mogga blogginu og minnir margt á Þjóðasálina gömlu á Rás 2. Hér hinsvegar fær fólk að segja það sem það vill og er ekki hindrað af tíma eða orðaflaumi.

Jón Valur Jensson er "sann kristinn" maður, það er að segja að ýtir undir fordóma gagnvart minnihluta hópum og finnst að heimurinn eigi að snúast um sýn lífs viðhorf og sinna trúarfélaga. Hann blandar kristnum gildum í allar umræður eins og það komi málinu eitthvað við og nú nýlega fjallaði hann um þá “firru” að borgin skuli voga sér að styrkja samtök samkynhneigðra. Hann fer mikinn í hatri sínu gagnvart hommum og lespíum enda sannur boðberi kærleiks og friðar hinnar kristnu kirkju.

Reyndar er það svo að Jón Valur er með eindæmum hrokafullur maður og lítur niður á alla þá sem eru ekki sammála honum, segir að þeir viti ekkert í sinn haus af því að hann er guðfræðingur. Hann ávarpar alla í þriðju persónu eins og hann sé að tala fyrir fullum sal en ekki beint til þeirra manneskju sem hann er að svara. Væntanlega er það gert til þess að æfa sig fyrir  þingmennsku sem hann greinilega dreymir um enda einn af forsvarsmönnum, ef ekki stofnandi Kristins Þjóðarflokks. Svona menn fara í mínar fínustu. Menn sem álíta sig betri en aðra vegna trúar sinnar og allir aðrir hafa rangt fyrir sér.

En hvað um það. Ég gerðist svo kræfur að svara einu af hans kommenti og benti á hræsnin í orðum hans þegar hann gerði lítið úr hópum sem tala fyrir sínu máli. Fór það svo að orð mín voru strokuð út af því að hann leit á þetta sem persónulega árás. En með nýjustu tækni (Back takkanum á vafranum) náði ég í svarið mitt og birti það hér ásamt hans orðum. Gekk ég of langt?

 

Hans komment: Á vefsíðu "Kristinna stjórnmálasamtaka" rakst ég á grein undir nafninu "Hugleiðing um sefjunarstjórnmál fyrir kosningar", þar sem segir m.a.: "Í sefjunarstjórnmálum hafa skynsamir menn fyrir lifandis löngu lært að meiri hluti þeirra sem opnar munninn, talar eingöngu fyrir hönd síns hagsmunahóps, kynnir sitt þrönga sjónarhorn eins og lögmaður fyrir rétti. Auðvitað er þetta kostulegt. Eg tala nú ekki um ef hægt er að láta líta svo út sem þessi hópur sé fórnarlamb.

Mitt komment: Og hver er þá munurinn á þér og þessum hópum? Þú ert með einstaklega þröngt sjónarmið, talar eingöngu fyrir hönd allra kristinna manna og álítur að íslenkst þjóðfélag og Kristin gildi séu fórnarlömb samkynhneigðra sem þú telur tröllríða þessu þjóðfélagi.

Ég skil bara ekki, og þetta á ekki bara við þig heldur aðra af þinni trú, hvernig hópur sem telur sig vera boðbera kærleika og friðar skuli efla svona hatrama baráttu gegn hópum sem passa ekki inn í ykkar heimsmynd af því að rit sem þið kjósið að túlka eftir hentugleika segir í einni línu að menn skulu ekki liggja með öðrum mönnum. Hvar er kærleikurinn? Af hverju hatar þú homma og lespíur? Þau eru, samkvæmt þinni trú, komin af Guði og ættu að vera virt sem slík. Satan hefur ekkert með þetta að gera og það er ekkert samkynheigt samsæri í gangi. 

Verst af öllu er að þú ert að etja vonlausa baráttu. Þú og þínir munu aldrei losa heiminn við samkynhneigð. Þið verðið bara að læra að lifa með því. Þetta er eðlilegur hlutur og hefur ekkert með trú eða kristileg gildi að hafa.

Enginn virðir þann mann sem heldur að hann sé hafinn yfir aðra og vill segja þeim fyrir verkum.

Hard Gay Whooooooo!

Í ferð minni til Japans síðasta sumar þá komst ég lítillega í kynni við persónuna Hard Gay. Japanir eru með mjög sérstakan húmor og þeir eru hrifnir af ýktum persónum og vitleysisgangi sem myndi flokkast undir “slap-stick” hérna á vesturlöndum. Einnig eru þeir afskaplega opnir fyrir allskonar flippi sem yrði seint leyft hér meðal okkar pólitískt rétthugsandi þjóðfélags.

Hard Gay er grínisti með aðeins einn brandar, hann klæðir sig upp eins og steríótýbískur leður hommi, segir whooo eftir nánast hverja setningu og hreyfir mjaðmirnar á eggjandi hátt. Maðurinn á bak við persónuna varð þekktur sem fjölbragðaglímumaður í þessum búning, er gagnkynhneigður og giftur glæsilegri konu. Hann er fáránlega vinsæll þarna úti og mér finnst hann hryllilega fyndinn á sinn asnalega hátt. Ég er þó alveg viss um að teprur hérna heima myndu fá hland fyrir hjartað að sjá þennan mann hnykkja mjaðmirnar framan í leikskólakrakka um leið og hann hjálpar þeim að komast yfir það að vera matvönd. Hann er einnig mikill baráttumaður fyrir því að samkynhneigðir í Japan fái viðurkenningu en Japan er ekki beint framarlega á þeim sviðum, eins opið og það er nú venjulega. Það er bara gott mál.

Hérna er linkur á slatta af videóum með honum á youtube.

Hard Gay Whooooo! 

Zero Pepsi?

Ætla aðeins að bæta inn í þessa Kók Zero umræðu sem hefur verið í gangi.

Núna rétt áðan var ég í Bónus á Laugarveginum að kaupa það nauðsinlegasta og eins og ávalt þá endaði ég ferðina í gos kælinum að ná í minn daglega brúsa af Pepsi Max. Ég tók eftir að Kók megin í rekkanum var búið að stafla upp skínandi fínum Coke Zero flöskum og auglýsingar þöktu allt saman. Ég glotti aðeins yfir hversu ótrúlega þeir reyna mikið að vekja á sér athygli, labbaði framhjá og beint í átt að Pepsíinu góða. En hvað? Pepsi rekkinn var gjörsamlega tómur, bara nokkrar dósir eftir.

Er herferðin hjá kók að skíta algerlega upp á bak þannig að það kaupir þetta ekki nokkur sál og fer frekar í Pepsíið? Mér þótti þetta miður því að nú varð ég að kaupa Coke Zero og sötra nú á því á meðan ég skrifa þetta. Fínn drykkur og nákvæmlega sá sami og Coke Light en samt ekki eins góður og Maxið.

Af skrifum fólks hér á blogginu þá finnst mér eins og að fólk sé mjög illa við þessa herferð og kjósi að sniðganga vöruna. Það væri forvitnilegt að sjá sölutölur hjá Vífilfelli og sjá hvort að þessi “stærsta herferð sögunar” hafi verið áhrifarík. Mig grunar ekki en forsvarsmenn Vífilfells muni aldrei viðurkenna það.

Góðir eða slæmir foreldrar?

Orðinn hundleiður á þessari klám umræðu en ég rakst á þessa merkilegu frétt á alnetinu.

Fjölskyldufyrirtæki í klám bransanum.

Flugfreyja/Topp módel/Lögfræðingur/Sálfræðingur og djöfulli hress.

Á föstudagskvöldið lenti ég í skemmtilegu en einnig frekar sorglegri lífsreynslu.

Ég sat á einu öldurhúsanna með félaga mínum og kærustu og sötruðum á ólgandi bjór svona til þess að ylja beinin. Ég tók eftir ungri stúlku sem kom askvaðandi inn á staðinn og settist hjá mönnum sem sátu rétt hjá okkur. Stúlkan var greinilega ölvuð en afskaplega hress, brjóstgóð með eindæmum og alls ekki illa útlítandi. Þannig að það var svo sem ekki skrítið að maður tók eftir henni. Ekki veit ég hvað hún var að segja við drengina en hávær var hún og hress. Svo stóð hún upp, fór á barinn og hlammaði sér svo niður hjá okkur og spurði á lélegri ensku hvort hún mætti sitja hjá okkur. Við vissum eiginlega ekki hvað við áttum að segja en hún var ekkert að hlusta á okkur til að byrja með. Hún sagði okkur sorgarsögu um það hvernig einhver feitur ógeðskall hefði hent henni út af Óliver og sakaði hana um að vera 17 ára. “Lít ég út fyrir að vera 17 ára?” spurði hún og kippti opnum frakkan sinn og sýndi okkur þessi stóru brjóst sín sem greinilega höfðu verið keypt nokkru áður. Svo kom sagan um að hún væri búin að vera út í LA í fimm ár og að hún væri að vinna sem flugfreyja hjá Atlanta og væri afskaplega seinheppinn. Þetta sagði hún þegar hún missti sígarettu á gólfið og setti andlitið á sér næstum í klofið á mér við að ná henni upp. Kærastan var ekki alveg á því að þessi pía væri að angra okkur með þessari vitleysu og kallaði til dyravörð til þess að biðja hana um að færa sig. Stúlkan brást hin versta við, sagði að hún væri búin að búa í LA og væri topp módel, eins og það skipti einhverju máli. Svo kallaði hún okkur ógeðslega ljót og feit.

Tveir drengir sem sátu fyrir aftan okkur björguðu stúlkunni frá því að vera hent út og báðu henni sæti sem hún þáði og kallaði okkur ljót aftur. Dyravörðurinn vildi nú samt fjarlæga stúlkuna af staðnum vegna þess að hann efaðist um aldur hennar en þá sagði hún að hún væri lögfræðingur og myndi kæra hann ef hann snerti hana. Strákarnir misstu svo þolinmæðina og skildu hana eftir með tvö full bjórglös. Hress stelpa það. Á endanum var henni hent út en eftir það þá fengum við að vita frá einum barþjóninum að hún hefði sagt vera sálfræðingur og hefði sálgreint þjóninn þegar hann afgreiddi hana.

Mig langaði afskaplega að fylgjast með ævintýrum þessarar stúlku um kvöldið. Væri gaman að heyra hvað hún myndi segjast vera á öðrum stöðum. Læknir? Njósnari? Leikari? Hver veit. En það er gott að vita að Atlanta skuli ráða svona hæfileikaríkt starfsfólk.

Greyið stelpan segi ég bara.

Meira Action.

Tökum á stuttmyndinni lauk í gær morgun eftir þrjár tökunætur. Allir voru vel uppgefnir en hressir með gott verk. Allt lítur helvíti vel út og fara menn að eftirvinna kvikindið á næstunni. Ég er mjög spenntur að sjá loka útkomuna. Maður sat yfir leikstjóranum og horfði á skjáinn lýsast upp með fallegum tökum. Í einni tökunni þar sem leikarar öskra í skelfingu þá urðu smínkan og props stúlkan svo skelfdar að þær veinuðu með leikurunum, svo mikil var innlifunin. Það getur bara boðað gott.

Hérna er smá forsmekkur af ósköpunum.

Action!

Búið að vera hressandi helgi. Ekki út af fylleríi eða einhverju svoleiðis, fór reyndar á eitt slíkt á föstudagskvöld.

Nei ég var og verð í kvöld, viðstaddur tökur á nýrri stuttmynd sem ég og félagi minn Ottó Geir Borg skrifuðum saman. Það er ekki á hverjum degi sem maður verður viðstaddur svoleiðis og bíó nördið sem ég er var skælbrosandi nánast allan tímann. Þetta er nefnilega ekki bara við tveir með litla kameru og vini og kunningja í hlutverkum. Nei þetta er alvöru dæmi, með sviðmynd, búningum, förðun, tæknibrellum og alvöru leikurum. Tæknifólkið er allt fag fólk og gott í sínu starfi og leikstjórinn reyndari en andskotinn. Gerist varla meira töff fyrir fólk eins og mig sem myndi sennilega sprauta kvikmyndum beint í æð ef það væri hægt.

Myndin verður nefnilega algjört einsdæmi í Íslenskri kvikmyndasögu. Það kann að hljóma stórt en þegar við horfum yfir Íslenska kvikmyndagerð þá er aðallega verið að ræða um drama, grínmyndir og misheppnaðar spennumyndir einstaka sinnum. Við ætlum að reyna að auðga flóru kvikmyndageirans hérna með okkar mynd, sem er bæði þjóðleg með eindæmum en ætti líka að höfða til áhorfanda, sem er okkar takmark. Við viljum fá íslendinga til þess að vilja sjá íslenskar myndir aftur og skemmta sér í bíó fyrst og fremst.

Það er of snemmt til þess að ræða um innihald myndarinnar eins og er en maður droppar kannski við seinna og lætur þá sem áhuga hafa fá eitthvað fyrir sinn snúð.

 

Ein spurning. Hvernig gæti maður þýtt yfir á ensku setninguna; Hvað ætlar þú að gera við þetta? Baka vandræði?

Er hér með leitað eftir þýðingu sem myndi innihalda einhverskonar tilvísun í kökugerð og kökukefli.

Hugsaðu eins og Katrín Anna Guðmundsdóttir annars bannar hún þig.

Katrín Anna Guðmundsdóttir hvetur fólk til þess að hugsa með blogginu sínu. Það heitir nú einmitt “Hugsaðu” og maður hefði haldið að manneskja sem setur þetta fram hvetti til sjálfstæðar hugsunar, valið um að komast að sinni eigin niðurstöðu og halda henni uppi. Innihald síðu hennar gefur samt til kynna að það liggi einhver kaldhæðni í þessum titli.

Í dag bauð hún upp á skoðana könnun til þess að athuga hvort að fólkið þarna úti væri ekki örugglega á sama máli og hún þegar kemur að kynferðislegu frjálslyndi. Hún orðar þetta hinsvegar svona “ Hvað er kynferðislegt frjálslyndi í þínum huga? Takið eftir að ég feitletraði “í þínum huga”. Svo bíður hún fólki upp á fjölbreytta valmöguleika um það svar sem í þeirra huga passaði við þeirra skoðun.

Þetta voru valmöguleikarnir.

1. Að kynlíf sé falleg tjáning á milli tveggja eða fleiri einstaklinga sem ganga jafnir til leiks og hafa yfirráðarétt yfir líkama sínum sjálfir. (ekkert athugavert við þetta)

2. Að verja rétt einstaklinga til að horfa á konur kallaðar druslur, hórur og tíkur á meðan brundað er framan í þær í kynlífsathöfnum. (Jæja já)

Skemmtilega orðað finnst ykkur ekki? Ekki er hægt að velja neinn millilið, bara svart og hvítt. Hvað mynduð þið kjósa? Það er voðalega lítið sem fólk sem er ekki svona róttækt hefur um að velja og er því ekkert á boðstólum sem er “í þeirra huga” svar við kynferðislegu frjálslyndi.

Ég, klámhundurinn sem ég er og verjandi barnakláms eins og hún orðaði það gaf skoðun mína á þessari fáránlegu orðaðri spurningu og benti á að eins mikið og henni líkaði illa við það þá væru til fólk, konur og karlar sem hefðu gaman af hörkulegu og sóðalegu kynlífi. Það eru til konur sem finnst æsandi að láta kalla sig öllum illum nöfnum á meðan kynlífi stendur og karla líka. Ég tók dæmi um stúlku sem ég þekki sem vill láta slá sig utanundir á meðan mökum stendur og tók það einnig fram að kærastinn hennar fannst það óþægilegt og vildi ekki gera það, sem er fullkomlega skiljanlegt, þætti það hálf óþægilegt sjálfur. Ég benti henni á BDSM sem gengur út á drottnun, undirgefni, sársauka í sumum tilfellum og niðurlægingu. Þetta er fólk sem hefur gaman af sínu kynlífi og ég spurði hana hvort að þetta lið væru pervertar í hennar augum. Ég sagði að í mínum huga væri kynferðislegt frjálslyndi að stunda það kynlíf eins og manni sýndist, svo framarlega að þér og félaga þínum fyndist það gott. Hvort sem þú villt láta brunda framan í þig, láta kalla þig druslu eða láta slá þig í framan. Þér er frjálst að stunda það kynlíf sem þér finnst gott. Það er kynferðislegt sjálfræði. Hefur ekkert með klám að gera.

Ég skrifaði þessi skilaboð á síðuna hennar og ég vissi að hún ætti það til að stroka út þau komment sem henni líkaði ekki við en ég reyndi að skrifa þau á vitsmunalegan hátt þannig að þau liti ekki út eins og einhver gelgju bjáni sem bölvar öllum femínistum á netinu hefði skrifað þau. Það eru hálfvitar sem gaspra út um rassgatið á sér og ég get svo sem alveg skilið að henda slíkum kommentum þar sem þau eru bara gerð til þess að hrista upp í lesendum en bæta engu við umræðuna. En nei. Klukkustund síðar skoðaði ég síðuna hennar aftur og sá að ekki aðeins var hún búin að fjarlæga kommentið mitt heldur var hún búin að banna mig frá síðunni. Ég get sem sagt ekki haft mína skoðun lengur á hennar svæði vegna þess að það verður sennilega á skjön við hennar eigin. Ekki nóg með það heldur kallaði hún mig verjanda barnakláms sem er svolítið einkennilegt þar sem ég varði ekkert barnaklám í mínu svari, minntist ekki einu sinni á það og færi aldrei að verja það. Þetta sagði hún.

“Er gjörsamlega búin að fá nóg af fólki sem ver vísanir í barnaklám... Eins og ég hef sagt áður þá verður mitt blogg ekki vettvangur fyrir slíkt og ég gæti jafnvel tekið upp á því að banna komment frá þeim sem blogga um slíkt... tók reyndar upp á því rétt í þessu... “

Ég og annað fólk má sem sagt ekki hugsa lengur. Við megum ekki vera með okkar eigin skoðanir, við megum ekki andmæla henni á neinn hátt sem gæti skaðað hennar skoðanir og þeirra í kringum hana. Við eigum að halda kjafti og hana nú. Þar fór gott lýðræði  í hunds kjaft. 

Þetta eru náttúrulega þekktar aðferðir þrýsti og öfgahópa. Drekkja öllum öðrum skoðunum, til fjandans með sjálfstæða hugsun, það sem við segjum mun ráða. Hagræðum upplýsingum í okkar þágu, segjum nógu oft að meirihluti landsmanna sé með okkur á bandi og þá fer fólk að trúa því, þótt að tölur sýni annað.

Fólk eins og Katrín Anna eru ástæðan fyrir því hversu slæmt orð femínistar eru að fá á sig þessa dagana. Þú verður að sætta þig við að fólk hefur aðrar skoðanir og þú og ef þú ætlar að láta taka þig alvarlega verður þú að taka tillit til þess, hversu ósammála þeirra skoðunum þú ert. Það er lýðræði. Annað er kjaftæði.

 

Titill síðu Katrínar ætti frekar að vera “Hugsaðu...eins og ég.”